【心態武裝】大家有冇認真諗過咩係人血饅頭？
大家喺五一黃金週有冇幫襯黃店呢？黃店因為抗爭而賺到盤滿缽滿，有人會話咁樣係食人血饅頭。嚟到心態武裝嘅第三集，Gear噏想講下經常被錯誤引用嘅「人血饅頭論」。
人血饅頭論嘅典故
「人血饅頭」一詞出自魯迅嘅短篇小說 《藥》，故事講述無知百姓華老栓誤信人血饅頭能醫百病，咁啱革命者夏瑜被處決，於是佢就向劊子手買沾滿夏瑜鮮血嘅人血饅頭畀個仔食，最後個仔都係病死咗。
故事中嘅劊子手同華老栓借他人被斬首嘅不幸去謀取私利。喺香港抗爭嘅語境，「食人血饅頭」就係講緊有同路人利用手足義士嘅不幸或犧牲去謀取個人利益。
何謂食人血饅頭
究竟點先算係人血饅頭？呢個問題無論喺抗爭陣營內外都係眾說紛紜。有人覺得同抗爭有關嘅謀利就係人血饅頭，而對家又話我哋食緊前線或年輕人嘅人血饅頭。人血饅頭論已經變咗一種指控，用作質疑對方行動嘅動機，繼而鼓吹捉鬼或人格謀殺。
為咗提供討論基礎，我會假設群眾係理性，能夠觀察並依照對抗爭回饋嘅多少，作出符合比例嘅捐獻或支持，論功行賞。喺呢個前設下，我嘗試將「食人血饅頭」定義為「利用抗爭者嘅不幸或犧牲謀取個人利益，而完全冇回饋抗爭嘅行為。」以下我會用一啲常見嘅人血饅頭謬論作分析：
選票與人血饅頭
好多人經常會將選票同人血饅頭混為一談，挑戰參選人或政客嘅意圖。2016年新東補選，長毛梁國雄曾經批評梁天琦，針對「時代革命」口號同勇武抗爭主張，話：「如果用革命做幌子叫人投佢一票嘅人，係食緊人血饅頭。」梁天琦參選係有一定個人利益，但魚蛋革命的確係時代革命嘅先聲，掀起嘅本土思潮亦對群眾影響深遠。群眾投票畀梁天琦係純粹相信本土同革命，再者梁天琦自己都係革命嘅犧牲者，何來人血饅頭呢？
時任浸大學生會會長方仲賢曾經話如果蔡英文咩都唔做嘅話，就有食香港人人血饅頭去選舉嘅嫌疑。事實上，台灣幫香港流亡手足只係義務，而蔡英文勝選對香港局勢絕對有利。即使蔡英文借香港抗爭助選係有個人利益，但對群眾嘅回饋早就仁至義盡。
西貢區議會就命名紀念公園引起咗唔少爭端，將軍澳民生關注組嘅李嘉睿話：「在席民主派議員都係靠食人血饅頭先選到入嚟。」假如民主派區議員係借助反送中大勢當選，選後卻毫無作為，只識享受個人利益，冇積極對選民同抗爭回饋，我認為咁嘅情況先算係人血饅頭。人血饅頭與否取決於有冇對抗爭嘅回饋。
黃圈與人血饅頭
逢親涉及到個人利益嘅抗爭活動，總會有人拎人血饅頭論出嚟講，黃色經濟圈係首當其衝。黃色經濟圈嘅原意係同路人之間互相扶持，壯大抗爭者嘅經濟資本，係咪當中賺到錢就係人血饅頭？
消費活動從來都係你情我願，例如你見到某黃店積極投入抗爭支援，即使食物質素欠佳都願意去支持，因為你欣賞佢喺抗爭方面嘅努力。只要你係憑理性觀察同思考，冇贖罪券心態、藥石亂投等情況嘅話，黃店嘅付出（抗爭支援或產品質素）同收獲（群眾嘅捐獻或支持）應該會符合比例，就唔會造成所謂人血饅頭：有部份人賺取暴利，但無論佢喺抗爭付出定產品質素上都唔值得。
賣抗爭主題產品又係食人血饅頭？黃色經濟圈其中一個目的係想將抗爭符號帶入生活。有人買係想提醒自己唔好忘記，亦有人係想帶出街做另類文宣。所以賣抗爭主題產品喺賺錢嘅同時，係滿足緊同路人嘅需要，對抗爭亦有一定回饋，多做無妨。
至於經常有人話扮黃呃錢、食人血饅頭，首先要分清楚究竟係「扮黃」定係「呃錢」。「扮黃」係誅心論，重點應該放喺客觀事實，例如佢為抗爭做咗幾多嘢。如果佢喺冇詐騙嘅情況下「扮到好黃」，於是得到好多支持同利益。反正佢嘅行為有助運動發展，你應該反思點解咁多人願意信服佢，而唔係指責對方食人血饅頭。
而「呃錢」本身個問題係詐騙，已經超出咗人血饅頭論。如果有實質證據證明，無論係扮黃扮藍都好，詐騙都應該要肅清。
人血饅頭論係誅心論
有好多人引用人血饅頭論嚟指控對方做事係另有目的，只係純粹為個人利益，並非為咗抗爭大局。喺冇實質證據嘅情況下，話對方食人血饅頭係一種猜測對方動機嘅論述，本質同「捉鬼」、「話人扮黃」無異。
參選立法會係為咗十萬人工，唔係真心想改變香港；黃店貼文宣係為咗生意招徠，唔係真心撐抗爭；藝人表態係為咗上位，唔係真心幫香港人講嘢。事實上，好多嘢都係既有私利，亦有公利，唔係咁黑白分明。公利係我哋觀察到嘅，唔需要去猜疑對方動機，只需要去睇對方做嘅實事。如果係低調到其他人睇唔到你做過咩，導致不必要誤會，咁就另作別論，自己取捨。
人血饅頭嘅意義
魯迅嘅故事入面，革命者為救國救民被處決，民眾無動於衷。死者嘅鮮血反被迷信嘅百姓買嚟做人血饅頭去醫病。先烈嘅犧牲有冇價值，重點在於我哋係會覺醒去繼承前人遺志，定係若無其事，甚至借助人血去滿足一己私利。故事話畀我哋知，唔重視革命先烈犧牲，諗住坐享其成嘅人，最後會自食其果，國家同民族亦會喺愚昧同冷漠中覆亡。
正如抗爭嘅犧牲係歷史必然會發生，血係一定會流。唔好怕俾人話食人血饅頭，如果你覺得可以借助手足嘅犧牲，去成就革命大業嘅話，就憑良心繼續做你認為啱嘅事。與其白白浪費手足嘅鮮血，不如吞下所謂人血饅頭，帶住嗰份力量再上戰場殺敵。