【矛盾大對決】究竟中共定地球滅亡先？

今晚真係瞓唔著，熱到瞓唔著。

有諗過換返背心短褲瞓，因為真係好易拎，夏天冬天衫都撈埋晒一齊；不過都係懶，開風扇吹下算。

好似話下星期又凍返，哈哈。

記得上年十二月問依個問題個陣，我仲係覺得地球會滅亡先，因為人地winter on fire，點知我地連winter都冇；到二月再問我就覺得地球仲有希望，因為肺炎死多啲人，中共醫療系統崩潰，此消彼長應該可以玩多幾年。

今晚我都係覺得，地球會玩完先。

淨係講今個月，啲口罩醫療用品刺激左幾多消費，消費過程制造左幾多垃圾。淨係講我屋企個垃圾桶，因為冇蓋，我地每次掉口罩都會入落個保鮮袋綁實先，每人每日一個，四個人一個月就成百個。

買外賣食安全啲，每日午餐配給都用幾個兜，有時用膠，有時用發泡膠，用乜都好都係食完就掉，分湯上每日起碼用得五六個。

仲有幫區議員入自製洗手液，見到幾千個藥水樽，心諗大家用完又係掉，咁嘅樽留尼仲可以有乜用。

叫得上半個環保L嘅我，依個月除左跟人搶廁紙買左條再造紙之外，真係冇乜環保野做過。

咁可以點啫，你見班所謂環保L都冇聲出，就知冇辦法啦。

我又諗，係咁啱依啲垃圾俾我見到啫，平時每日醫院都咁多垃圾，淨係每輪派藥都有隻杯仔，一日幾千萬個走唔甩。

於是我又諗深一層，環保真係好弔詭，環保放上政治更加係荒謬。人類文明發展by definition就係要製造，製造就會生產垃圾，於是文明就等於製造垃圾，講環保簡直係同全人類宣戰。

所以就有咩可持續發展，不過正確嘅事好平庸，平庸就太冇gimmick，唔啱玩政治。

對於人類文明尼講，環保個ranking真係好低，水未浸到腳之前，少少事都行先過環保，增加環境成本好過增加自己成本。

諗起上年食左一身椒，二話不說係換左件tee隨街掉左佢，驚毒害到屋企人。俾我再中多次，我諗我應該都係會掉。

讀多啲歷史就發現全球化唔係必然，可能人類文明都唔係，幾千年前啲古國都係敵唔過自然而滅亡，話唔定攬炒嘅究極係搵地球陪葬呢。