入油最慳錢兼拖數方法-加德士私人能源咭/紅卡最盡減$4.６

近排油價創近一年新高，相信非大宗商品投資者都會有感覺，只要你有揸車。。。

其實加快減慢呢個老問題，我哋呢個層面解決唔到，財政預算案政府大幅增加牌費（一加加30%！）又要硬食。我哋一定要想方法慳到盡！

慳錢重要過賺錢

但其實喺理財嘅角度，慳到一蚊係重要過賺到一蚊，因為你要賺錢必須要承擔相應嘅風險或者付出成本，但係慳錢係一個冇風險同冇成本嘅情況底下能夠累積資本嘅最佳方法。

如果你明白呢個道理，我建議你盡快申請返一張加德士私人能源咭(俗稱紅卡)

申請方法

1. 親身去加德士油站問阿叔拎紅卡申請表（呢個係最簡單方法，油站阿叔會教埋你點做）(睇下邊間最近你: https://www.caltex.com/hk/zh/find-a-caltex-station.html)
2. 網上下載申請表 (網站連結: https://www.caltex.com/hk/zh/motorists/products-and-services/caltex-starcard-for-drivers.html) 

所需文件

1. 最近兩個月嘅糧單
2. 身分證副本
3. 住址證明
4. 牌簿副本

優惠特點

1. 每公升扣減兩個半銀錢（$2.5）（不限日子）
2. 可同時使用油券（同其他咭最主要分別，一般優惠咭唔可以同時使用油券）

如果結合以上兩項優惠同時使用，我試過最高每公升汽油可扣減四個四銀錢（$4.4），遠高於現行油站於特定日子最高可扣減兩個八銀錢（$2.8）嘅優惠。

計算方法詳見下圖（以今日油價計算）

油券獲取方法

去某啲商場消費，整泊車優惠時商場會俾你。好多時你有禮貌啲咁叫個姐姐俾多張你，佢係絕對唔介意俾多幾疊你架！男人老狗呢個位唔好怕羞！

俾錢方法（親身經驗）

同其他優惠咭唔同，用紅卡每次入油都唔洗即時俾錢/碌信用卡，而你係會每個月收到月結單，然後直接從你預先登記嘅銀行户口扣除。但如果你喺佢扣數之前直接用信用卡俾錢，加德士係唔會再從你銀行戶口扣錢。即係話，如果你用信用卡來找張月結單嘅數，由你入油計起去到啲錢真係從你身上面離開，最長有兩個月時間。用信用卡找數俾起直接從銀行扣數，你仲可以賺到信用卡回贈。［十分屈機］

結論

除咗每Ｌ平兩個六銀錢，如果你記得＜窮爸爸富爸爸＞作者羅伯特·清崎講過，我哋唔可以過期找數以免被罰款，但係我哋一定要有咁長拖咁長嚟找條數，因為如果你有方法喺找數前將啲應該要找數嘅錢增值，呢一個先係最佳嘅理財方式。呢個亦係用紅卡嘅關鍵位！