森林之約｜山林療癒理論培訓嘅感受（廣東話)

連續兩日去慈山寺上堂讀山林療癒陪伴員嘅理論。一大棚人八點鐘就响大埔太和邨集合，我早到，義工好快就安排咗我上接駁巴士。人潮慢慢進入講堂，漸漸坐爆。陳主任後來透露，網上加現場總共有500名學員，而最後只會招募100名陪伴員。原來唔少人有火做山林療癒陪伴員，都幾搶手。要畀錢讀書，就算攞到正式陪伴員嘅資格，亦只係可以响慈山寺做義工啫，唔可以用呢個牌頭去出面搵食，估佢唔到咁踴躍。

課程非常充實，由森林療癒嘅緣起，到相關嘅科學證據，引伸到森林療癒嘅設計同响慈山寺落地改善嘅山林療癒特色同埋應變方法。由四位美國自然與森林療癒嚮導協會認證嚮導同我哋講解同分享，落堂雖則要應付網上測驗，上堂嘅氣氛依然係輕鬆又實際，有野落袋。

森林療癒係乜野神奇魔法?

如果你有多過93%時間困响室內，就有大自然缺失症，容易產生負面情緒。世界各地都有科學證據支持，森林中有幾種成分對身心有益:

• 芬多精，係天然嘅殺菌劑，有助減低血壓，增強免疫力，減少壓力賀爾蒙分泌。森林中聞到檸檬桉味，松樹，香草味就係佢哋嘅萜烯成分。
• 喺環境污染或者焦慮嘅情況下，身體嘅正離子會多過負離子，血液會釋出生物氨，令人過敏，易攰，不安，疼痛等生理反應。森林入面嘅負離子數目遠多過城市，夠我哋用有突。你摸吓棵樹或者泥土，因為身體有七成係水份，超過電，可以好好平衡電荷。當身體嘅負離子多過正離子，就能夠減輕以上反應。
• 母牛分支桿菌能夠改善生活品質，等人樂觀尐，提升認知能力同活力，無咁頹。特別係落完雨，就會聞到果陣泥土除。

睇到咁多實證支持，覺得好堅。當然，如果你指望森林療癒可以喺指定時間醫到指定疾病，咁就諗多咗，因為佢嘅療效好難計。

森林療癒同行山有乜唔同?

行山通常係有目的地，要去到果度。可能會傾住計行，可能會一路行一路搞工作生活上嘅嘢，亦可能會匆匆趕路。

森林療癒希望參與者放低手機，專注當下，慢步止語， 尋回平靜，細心觀察，去同自然作出連結。帶你回到當下，打開五感，用正念去覺察萬物，感受被愛。

所以，進行森林療癒嘅場地其實細到400米就已經可以，無需趕路去特定嘅目的地。可以响唔同季節，唔同時份，進行多次體驗，以林聯繫，以森療心。

山林療癒會傳揚佛法嗎?

山林療癒喺慈山寺觀世音菩薩像下面嘅正念徑進行，基本上成個氣氛都係詳和自在嘅。課程設計上將佛理融入山林療癒嘅體驗當中，以森療心，用五蘊(色受想行識)，六根(眼耳鼻舌身意)，六塵(色聲香味觸法)去解釋當中嘅理論。導師强調山林療癒係無宗教成分嘅，過程中亦應該避免運用佛教用語，因為大自然先係主角，希望參與者可以專注同自然連結，而唔係對宗教產生興趣。起初我仲擔心自己同佛佗唔熟，會影響考核資格，原來係庸人自擾。

正念徑得果三百米，點消磨個半到兩個鐘？

我平時慣咗大踏步走過郊野，呢段唔到5分鐘嘅路程，竟然可以磨到兩粒鐘，諗極都唔明。其實成個體驗時間包括咗最初嘅講解，同埋要由講堂慢步到正念徑嘅入口。當中會做開放感觀嘅熱身。响正念徑入面又有幾度做山林之約，每個大概廿零分鐘，等參與者連繫山林同埋分享，所以成個行程係相當充實嘅。換個角度諗，參與者有兩個鐘頭放空，如果真係能夠拋低凡間俗務，已經賺咗。

參與者係咪老馮要跟山林之約嘅指示？

山林療癒嘅大原則係開放，自主，無對錯，無標準。就算參與者拒絕山林之約嘅邀請，只要佢喺安全同埋唔騷擾其他人嘅情況下行動，陪伴員都唔駛糾正佢，可以畀佢隨心體驗山林。我以為响慈山寺呢類機構入面進行活動，會比較死板，估唔到又咁包容喎。

參與者分享感受果陣情緒激動，應該點搞？

每做完山林之約都會圍一個療癒之圈，畀參與者講啦，用手勢啦，或者其他方式去分享感受。陪伴員唔需要作出批判，讚賞，只需要細心聽，做見證。如果參與者情緒激動，陪伴員就應該等參與者行埋一邊抖吓，由大自然充當療癒者嘅角色。萬一參與者平復唔到，就應該搵職員幫拖。始終陪伴員都無接受相關嘅情緒輔導訓練，由專業人員處理會比較啱數。

慈山寺同正念徑環境優美，景色怡人，駛唔駛幫參與者做埋導賞？

慈山寺有正式嘅導賞員，講解得更加深入。山林療癒陪伴員嘅角色係引領參與者進行山林療癒嘅體驗，陪住佢哋同山林連結，等佢哋安心分享感受，見證佢哋嘅感悟。過程中陪伴員唔適宜講太多嘢。平時我同朋友行山，口水多過浪花咁樣講解，到時就要非常自覺同克制嘞。

陪伴員要孤身上路嗎?

每次慈森.山林療癒都會有支援人員跟手去做協調，負責聯繫其他組別，職員同保安，甚至幫助需要中途離隊嘅參與者。咁樣，陪伴員就可以專注做嚮導，去陪伴見證參與者嘅感悟。所以，我哋同時學埋做支援嘅技巧，第時可以撈埋呢瓣。

兩日培訓課程入面，仲想分享一尐片段。

慈山寺秘書長倪居士係其中兩課嘅導師，佢一出嚟就有度氣場吸睛。簡單嘅呼吸練習引領大家放開五感。佢分享短途出家嘅經歷，畀大家鬆一鬆。用人聽嘅話去講述佛學同森林療癒嘅關係。印象最深刻嘅係佢用幾組問答就能夠示範到五蘊嘅關聯。仲有佢隨心咁帶住大家行出講堂，去到每一棵跟佛佗有重大關連嘅樹下面逐一講解：出世嘅無憂樹，悟道嘅菩提樹同涅槃嘅娑羅樹。另外，畀佢呢句"trust the nature, no lies by nature"一棍毆醒，大自然從來就是咁純粹，風雨有時，寒暑有時，所有演變都是順勢而行，唔會弄虛作假，專登去玩鳩你。有呢個覺悟，就能夠專心一意去感受自然。

另一位講者係香港森林浴嘅創辦人易小姐，佢把聲好柔和，聽得好放鬆舒服。佢亦都分享咗佢嘅經歷同埋帶領森林浴嘅心得，我都有錢落袋，加深咗對森林浴嘅瞭解。

由於上足兩日堂，寺方都安排咗喺五觀堂食午齋。疫情緣故，我都係第一次喺五觀堂食嘢，至知道有止語，男女分食同埋唔可以過堂嘅規矩。因為人數眾多，座位有限，有尐同學差唔多等咗一個鐘先有得入去，而且得番三個字食嘢，大家都無怨言。唔怪得陳主任話同學都有慈悲心腸，如果响外面發生，應該有人會爆。

最後嘅程序係開書嘅網上測驗，因為講堂入面連唔到線，所以任我哋喺寺內乜嘢地方做都得。我就揀咗普門殿洛伽池對出嘅迴廊，等慈祥嘅觀世音菩薩照住我。以前考試總係勁緊張，今次雖然都有晉級嘅壓力，但居然心境平和咁完成咗成個考核，最後仲順利過關添。