勸阻無效？！管理員自行開房門維修！出門賞花花盡落@三月

某日帶團在外，中午前突然收到管理員message︰

因全棟無水的關係需開門配合讓師傅查修
將敲門無回應後自行開門

我第一個反應係︰痴撚線！

第一，出門前明明有水。第二，佢話懷疑漏水漏到全棟無水，咁應該全間房水浸。第三，最重要，無論咩理由都唔可以自行入屋。

覆佢，no，唔得，我唔同意。你要入屋維修等我係屋企既時候，約過個時間。

佢已讀不回。

管理員只係簽約時見過一次，非常典型台灣人個性︰想點就點。我見佢無覆驚佢真係入屋(或者已經入咗)，即刻複製法規，啦你未經我同意入屋，違法！

佢居然兇返我轉頭︰「我會轉達你的意見給所有房客因為誰無法配合、所以師傅無法查修。大家都知道，如果因你的問題屋主將對你求償。」典型台灣用群眾壓力逼你屈服。

言下之意係佢死都要入。我再強調，打咗成串字，總括而言︰一、你唔能夠入屋；二、我無唔配合，係你無同我約時間；三、你未經我同意入屋你違法！

佢話︰全程錄影。

痴線！即係死都要入。我模仿咗段法律條文，即係台灣好興但一直唔知有無約束力既「切結書」，反覆聲明我不同意任何人士用任何理由係我不在現場及同意之下入屋。

然後，佢又係無覆。

咁樣message來message去就用咗三個鐘。當時仲要帶緊團，仲要笑面迎人，講下天文地理歷史掌故。但個心好焦急，好想返去「捍衛我七點後既小角落」。

同時上網查證，唸定後著。佢真係入屋，我就報警，報警堅持告鳩佢。佢一定聲淚俱下，扮曬死狗講曬對唔住。一時心軟放過佢，佢下次又會肆無忌憚再入屋──你再告都告佢唔入。

可惜最高罰則只係9000台幣，一個月租都cover唔到。台灣普遍情況如此，罰則好低，無阻嚇作用。好聽係你永遠都有機會再嚟一次兩次三次，唔好聽咪︰「一個唔洗負責任既社會。」

悄然無聲返港

月初悄悄地回港一趟，幫手帶mini tour、續領隊牌。算是很嚴謹地報了名，考了試，八個小時在紅十字會。良久沒有聽這麼久的廣東話，感覺，舒暢。

出門前計算過2025年要回去續牌，這兩年多忙着忙着就忘記了。一月份收到旅監局email突然想起，對喔！那時在想有兩年半時間儲錢，回去個兩三天應該不成問題。沒想到兩年半都賺不到足夠的錢呀……

掙扎了兩三天要不要續，續，全程費用3000HKD，不知哪裡生出來。不續，6年牌照放棄之餘重考可能會非常難（課程有改）。終於還是續了。我在想，這可能是救命符，假如台灣的工作無法持續了，我還有寫稿、拍照、港領隊可以做……那當然也可能所有工作都輪不到我。

回鄉證五月到期，也續一續好了。因為大陸的銀行戶口還有1000元，必要時還是需要的。說來好笑，10年期的證件只用過5年，後面5年都疫情，好浪費。而原來2019距今都5、6年了。都不知道日子怎麼熬過來的。也不全然不知道啦，沒有腦退化，細節經過都記得，要用力地回想囉。年紀少的時候，各種想法和回憶會自動湧現，現在年紀大了，非得要吃力地回想，不然也不太想了。

行程很簡單，沒通知其他人，幫團入check-in自由活動。總之落機後直奔中旅社，辦好證。本來預計5:30才辦好，豈料3:30就辦好了。之後沒甚麼事，旅館check-in，皇室堡行一陣。去鵝頸橋食個飯，行1881。一直逛到10點才回去。這條路線是以往在台資書店工作時固定行程，想一想竟已十年前了。

睡一覺第二天上課考試，順利通過後，落大角咀，沿路走出尖咀食Five Guy，跟住，遇到大霧。超勁大霧。回南天起霧並非異常，雖然現在的局勢和環境會讓人有種金壁輝煌的城巿前途未卜的錯覺。而且得帶了相機出門，會有種，咁搞法的突然。

考完試重點是去旅監局交續牌表，以及把那支奇奇怪怪的鏡頭送上CS檢查。24–70mm f/4壞很久了，這一年多我居然靠一支85mm接案按了一年，有驚無險。檢查費250，合理過TW好多。

全個過程我留了4小時連交通時間去做，誰知道，上旅監局交表，5分鐘完成(連改錯處連檢查連埋同職員吹水)。去Nikon交低鏡頭，10分鐘。結果10:30已經做完曬預定要做既事，搭夜機，無所事事，走咗去食譚仔(此行重要目的)。照以前放假習慣，落惠豐(唔敢去星際)，去信和，再去現時點。好采時間早，好多鋪頭未開，如果唔係又破財。

電影中心係終點站，好想去買《白日之下》DVD。去到現場，唔知咩原因，見到最新既DVD竟然係年少日記。我買咗但未睇曬，已經好耐之前。新近港產片既碟都無，《九龍城寨》都無，《毒舌大狀》亦無。到底係無出版，定某啲原因無出……真心唔知。

心思思亦都想買林家謙，望一望，哇，288。算啦，無買行李，算啦，唔好唸太多。

高雄長住之可能？

有個PT同事每次見到我都會問：

你甚麼時候離職？準備留到甚麼時候？

其實我唔明點解佢咁問，咁我工都搵埋，屋又租埋，三五七年都走唔甩。本來我都唔為意，最近公司飯局真係太多，估唔到知道我非台灣原廠生產既同事居然都問我：「你有打算留下來再說啦。」

我心唸，吓？佢哋覺得「留低」既標準係乜？買樓、買車、結婚定咩鳩？我唸唔通。不過暫時高雄算係我覺得生活幾好既地方，經濟來源問題仲未解決，情緒壓力少咗好多。安全感就係差啲架啦，始終人治地方。

嚟到高雄之後，成日想出門，成日想影人像。以前係香港、台南、台中，都唔係經常出門，唔想囉，無乜特別。香港日日行，不太感興趣，台南台中沒有交通工具又跑不遠。有時候朝早執一執屋，洗完衫，煮少少野食，望一望點幾兩點，就唔想出街了。出得去到三、四點走唔甩，返到嚟又八九點。

最近係有幾次係掉低曬所有嘢出門，結果出去無乜收獲。三月想話出門賞花，點知去到，花已盡落。唯有影下落花，仲俾途人問我影乜，勁尷尬。返到小房間要補鑊趕工。亦開始買書，買一些自己想要很久，想要收藏的玩具或擺設。好幾年沒有買帶不走的東西或直接賣掉，現在反而有一點想要留住。搞不好真的會在高雄長居也說不定。目前，先解決眼前問，其他再說。

最近兩個月生活和工作都有點兒乏味，每天重複着上班下班，收工砌模型，睇下書，打下機。砌模型。收工後係開心既，無香港咁燥，無台中咁煩，當然好多問題依然未有解方。唯有唔唸住先囉，做咗啲力所能及既事情先。畢竟生活上好多嘢，好多頗為基本既生存條件仲煩惱緊。一個月返足7日都無10K HKD。

入戲院睇咗套最新既高達，唔太喜歡，故事唔完整。月中本來想去一轉台南影吓花，都係個啲啦，約好曬人，全部唔得閒。唸住一條友去，又租唔到車，咁啱又有團要導覽，唉算啦，搵咗錢先。依家唯有希望4月份可以出一趟遠門，兩日一夜，轉換心情。

每周一則城巿故事。突破點對點生活模式。
邁開腳步，劃出舒適的平面。喜歡原地遊的內容，請接續以下方關注更多動向：【 Facebook｜Instagram｜Patreon｜Gunroad｜Pinkoi｜500PX】