【香港文化】香港電影嘅生死關你乜事？

琴日香港電影金像獎公佈得獎結果，大家留唔留意到有唔少合拍片攞獎呢？《葉問4》係親中奶共派之作，《少年的你》直程係連粵語都唔講嘅中國電影。下文唔評論電影質素嘅優劣，想探討嘅係電影對香港文化有咩咁重要。



電影係文化載體

電影係人造嘅藝術品，或多或少會承載住特定嘅文化。

電影故事係民族嘅文化紀錄，《天水圍的日與夜》同《桃姐》所呈現嘅本土面貌同人情味，只有香港人先會感受到。

電影對白係民族嘅共同語言，一句盞鬼嘅《頭文字D》對白所引起嘅共鳴，可能勝過千言萬語。我哋透過電影去消費、定義同傳播本土文化。

電影代表住一個民族嘅集體回憶，例如不論男女老幼，身為香港人總會睇過周星馳嘅電影，並以香港電影嘅輝煌時代為榮。電影所承載嘅文化同語言，係跨越世代同地域，連繫一個個素未謀面嘅香港人。如果本土電影式微，香港人對流行文化嘅集體回憶，就只能依附喺外國電影，慢慢失去本土元素。

電影係意識形態

電影係傳播意識形態嘅重要媒介，係兵家必爭之地。例如《復仇者聯盟》推崇英雄主義、《上流寄生族》係批判階級社會、《葉問》隱含大中華國族思想。

相信有唔少人係睇《地厚天高》認識抗爭青年嘅諗法，睇《凜冬烈火》明白革命嘅意義。抗爭需要意識形態嘅傳播，而電影就係抗爭工具。

自簽訂CEPA以後，港中合拍片盛行，要得到中國市場同資金支持，就必先要為題材設限，再經過意識形態審查。

《樹大招風》同《十年》經歷政治正確嘅洗禮，遭到政權打壓，就算質素同口碑好，但都難以生存。政權透過流行文化控制緊香港人嘅意識形態，壓抑本土意識同創作自由，掌控文化嘅話語權。

電影係歷史詮釋

美國史家Hayden White提出「影視史學」(Historiophoty)一詞，意指「以視覺影像嘅論述，傳達歷史同我哋對歷史嘅見解。」[1]電影作為傳播媒介，相比文字有時更具感染力同表現力。越來越多人依賴電影去認識過去，相信唔少人都曾經透過二戰電影感受當時戰爭嘅震憾。

然而影像史學嘅資料係經過整理同編輯嘅知識，比起文字書寫嘅歷史記錄內含更深嘅意識形態。[2] 歷史電影唔單止係娛樂，而係形塑大眾對歷史認知嘅潛在力量。[3]

事實上，中共積極製作歷史電影，例如《建黨偉業》中就吹奏毛澤東嘅豐功偉績，對文革同六四隻字不提。如果我哋任由香港電影業繼續被紅色資本操控，最終可能會失去對歷史嘅詮釋權。

電影係文化產業

香港電影業盛極一時，孕育出一代國際巨星。但隨著時代轉變，市場慢慢萎縮，新晉演員難以發揮。另一舞台電視界就俾CCTVB壟斷，HKTV被無理打壓，去到最近Viutv先有新嘗試。有志投身演藝事業嘅年輕人，一係去中國拍合拍片，一係等待伯樂賞識，影視業嘅本土人才青黃不接。

電影唔係文化產業嘅全部，卻係流行文化嘅靈魂。電影作為文化輸出嘅媒介，能夠開拓文化市場，以往好多流行曲嘅熱潮都係靠電影或電視劇帶起。今時今日大家成日笑嘅本土Meme大部份都嚟自電影，證明電影對文化嘅影響係好大。所以要振興本土文化產業，光復電影業係不可缺少嘅一環。

電影係民族自信

香港民族曾經憑著出色嘅港產片，立足喺世界舞台之上。我哋嘅文化實力得到國際認可，係上一代引以自豪嘅成就。我哋見到韓國嘅《上流寄生族》問鼎奧斯卡最佳電影，日本嘅《屍殺片場》用低成本製作但好評如潮，台灣嘅《返校》呈現發人深省嘅歷史，每個民族都會為文化輸出而自豪。

如今香港「最佳電影」無論係發行商、取景、演員，甚至語言都係中國嘅，外國人睇到會點諗？香港曾經被譽為「東方荷里活」，港產片點可能輸畀其他電影呢？事實上香港近年都有好多出色嘅電影，等待大家嘅發掘同支持。港產片代表住香港民族輝煌，我哋要重拾民族自信。

光復香港電影

既然電影咁重要，身為一個普通嘅香港人可以做啲咩？電影業嘅問題錯綜複雜，我作為行外人，唔敢妄作定論，但我相信第一步係香港人要識主動欣賞港產片。好多出色嘅小本電影或獨立電影，因資源所限而未能大肆宣傳。只要我哋多啲主動發掘港產片嘅內涵，買飛入場支持，多啲鼓勵，少啲批評，就係振興香港電影業嘅開始。

好多人新年先去睇一次賀歲片，然後就話港產片乜乜乜。你可能會話港產片質素太差唔值得支持，但我敢講一句只係你近年錯過咗太多好電影。至於支唔支持埋合拍片，如同黃色消費，有人堅決抵制中國製造，亦有人覺得撐咗先講，所以係自己取捨。

本土文化係抵擋中共同化嘅重要堡壘，我哋必須要守住電影呢條戰線，自己文化自己撐。

[1]周樑楷（1996），影視史學與歷史思維-以「青少年次文化中的歷史圖像」為教學實例，《當代》，第118期，頁8-21。

[2] 羅志平（2012），民族主義與當代社會: 民族主義研究論文集。

[3]Roquemore, Joseph(1999). History Goes to the Movies: A Viewer's Guide to the Best (and Some of the Worst) Historical Films Ever Made, Main Street Books.

光復香港 時代革命

民族自強 香港獨立