一日書 ｜ 木獨

咩係孤獨？上網查「孤」的由來，見「少而無父者謂之孤」。要講嘅話，呢個講法都啱用，但係我又唔想將人生局限喺呢一句。

比起「孤獨」，廣東話「木獨」更加傳神。「獨」的狀態唔只係孤立無援，亦反映喺眉頭眼額上面。離遠見到一個人嘅氣場，原來可以真係成碌木咁。有時覺得人地成碌木，可能都係自己嘅投射。

當然，人唔會得一個狀態，起碼我呢刻臉皮夠厚，用真名寫嘢都未驚尷尬。仲要咁長氣唔知講乜，邊到木獨？但係木獨嘅精髓未必係口啞啞，而係尷尷尬尬、進退失據，「開口及着脷」。一係就辭不達意，一係就得罪人多、稱呼人少，把口快過個腦，講咗出口即刻就後悔。相比之下有啲人處事圓滑，同人相處悠然自得、氣定神閒，高下立見。

點解一個人好地地會變成「一碌木」？動物見到天敵會全身繃緊，準備「fight or flight」（一係死過，一係走佬）。喺人類社會入面，尤其係君子遠庖廚、好日都見唔到動物嘅大城市，又有咩生死關頭？最多都係半夜行後巷。

至於點解有時出面風和日麗，潛意識都唔比自己放鬆，形住隨時都要準備打仗咁？有一個可能，如果細個父母唔識管理情緒（甚至乎虐待），咁對於視屋企為成個世界嘅細路仔嚟講，又真係世界末日級別嘅生死關頭，唔夠打咪惟有 freeze up 扮死囉。

唉，又話唔講，講講下都係去返 upbringing。無計，可能表達能力真係有啲障礙。或者學睇相佬話齋，整定係木獨啲（我到依加仲未知佢咩意思）。

明知不擅溝通表達，點解仲夾硬嚟？可能因為呢個係外向者主導嘅世界，愈收埋自己就愈唔識溝通，最後都係自己蝕底。有冇其他辦法？有冇一個世外桃源係遠離是非，唔洗介意其他人點睇，甚至聽唔聽得明？好似又冇。就算有，慣咗 masking 之後都唔識仲可以點。

屋企人改我個名做呀「安」，原意應該幾好，希望我就算冇咩成就都好，至少安安穩穩。諷刺嘅係，so far 其實大部分真正想要嘅嘢最後都會得到，就係安全感難啲搵到。由於內心冇安全感，人生軌跡都唔算行得好安穩。

如果此心安處是吾鄉，希望唔洗再做異鄉人太耐啦。