2021年度F1上半季簡單回顧

經歷咗八個月之後，2021年F1終於嚟到暑假，而且過咗一大半了。不如就趁呢個空檔時間，一齊回顧下上半季發生咗啲咩事。

首先未開始比賽之前已經有 #WeSayNoToMazepin 事件，不過我就唔想提，因為閉門打仔，無人知。之後終於黎到巴林站嘅季前測試，我哋可以見到嘅係世界上最貴的二十部吸塵機係渡吸塵Www。係三日嘅測試中，我哋見到嘅係最後一年為紅牛提供引擎的本田，其表現力竟然比七屆車廠冠軍的平治優勝。今屆比賽嘅賽車修改比預期中影響大，但亦都係因為咁樣，先至可以令到今年上半季嘅賽事唔會好似之前幾年咁沉悶。另外平治表現亦都極度令人失望，三日以來圈數最少，而且受到不同問題困擾，絕對係百年難得一見嘅奇景，畢竟平時有如瑞士鐘錶準確嘅車隊竟然都有犯錯一刻。

去到2021年第一場正式比賽之前的自由練習和排位，除咗平治同紅牛鬥爭之外，今年新人嘅表現亦都係有少少喜出望外，雖然未去到可以排頭位出賽的表現，但絕對並非陪跑分子。去到正式比賽的時候，我諗大家淨係記得HAM不停超過賽道限制無事，但VER只係超過賽道限制一次就要即刻賠返個位，不過呢啲咁複雜嘅問題我就唔想討論，只係因為我唔識得點樣表達究竟邊個啱邊個錯。我反而係想講吓，係第一站比賽嘅時候，我哋終於可以見到2021年賽車嘅修改對於實際嘅影響。講真喺季前測試嘅時候我諗大家都無諗過紅牛架車會可以追得上平治甚至超過平治，不過亦都正如我之前咁講，正正係因為咁樣所以今年上半季先至唔會好似花車巡遊咁樣，每一站都係44 33 77咁樣公式返嚟。今站亦都係新人角田裕毅處女戰就成功得分。

之後下一站去到Imola賽道，首先係排位賽嘅時候，我哋見到嘅係日本新人角田裕毅撞車。去到正賽，今年第一場雨戰，我哋見到嘅係HAM撞牆事故，之後同一圈內BOT同 RUS撞車，大家應該仲好記得鐵頭功對一陽指。之後亦都好好彩出現紅旗，令到HAM有時間整車同埋唔使跌出得分區域。當然佢之後一圈一圈咁樣追番上去頒獎張枱嘅位置，亦都可以見到佢七屆世界冠軍嘅實力絕對係不容忽視，即使今年間車未必係全場最快。

下一站我哋返到去一個每年MotoGP也會舉辦賽事嘅葡萄牙Portugal 賽道。不出所料，平治紅牛在自由練習階段各有領先優勢，結果排位賽最終由BOT奪得頭位起步。可惜好景不常，保子始終都係保子，換完軚出返嚟之後，繼續都係係HAM後面。不過今場在一次展現PER養軚能力比場上任何一個車手更好，如果沒有規定車手一定要換軚，我相信佢應該真係可以一套車軚跑到尾。不過最後當然都係要換軚，結果又係我哋熟悉嘅44 33 77組合。

離開葡萄牙，我哋去到另一隻牙，就係西班牙。黎到西班牙加泰羅尼亞賽道，又係一條每年都舉辦MotoGP嘅賽道，今年唔同嘅地方就係終於修改咗10號同11號灣，目的就係為咗可以有咁多超車爬頭嘅機會（賽會聲稱）。不過可惜正賽嘅時候，1、2號灣嘅輕微碰撞，令到HAM跌出第一，而且更加讓VER取得頭位。正當大家以為今次終於可以係33 44 77咁樣完結嘅時候，HAM一聲唔該便採取Undercut 策略，除咗殺紅牛一個措手不及之外，更加於最後憑着較新嘅車軚奪得冠軍，絕對證明咗七屆世界冠軍嘅車隊果然名不虛傳，特別係策略研究呢方面Www

下一站我哋返到去久違了一年嘅街道賽道，摩納哥蒙地卡羅 。我相信大家都知道記得法拉利雖然獲得頭位起步，但係最後因為有不知名嘅損壞未能及時發現和修補所以DNS。雖然係咁，但係今站其實我覺得真係好悶，因為真係好少爬頭，而且大部份都係Pit Line入面爬頭Undercut或者Overcut，相比起其他站埋身肉搏嘅戰鬥，真係缺少咗不少樂趣。另一方面，我哋自去年巴林第二場比賽之後再一次見到平治Pit Stop出錯，不過今次出錯代價比上次大得多，令到BOT要DNF收場，亦都可能成就咗有記錄以來最長嘅F1 Pit Stop 紀錄：43小時15分鐘。點都好，今站亦都係今年第一次頒獎台沒有平治車手，亦都係法拉利久違了嘅頒獎台。而且整場比賽，我哋可以見到VER以破紀錄平均時速完成比賽，但HAM卻一直搵唔到合適車輛設定而係度掙扎求存。

之後繼續係街道賽，擁有超過2公里長大直路嘅阿塞拜疆巴庫。首先係排位賽，我哋見到三節都有紅旗出現。去到正式比賽，開頭都可以話平平無奇，但係去到中間，我哋首先見到STR因為不明原因爆軚，本身都冇乜太大問題，但比賽完結幾個圈之前，我地見到VER喺同一段大直路進入起步位置事態再次爆裂，雖然人沒有受傷，但領導領先位置蕩然無存。（如果之後有機會我或者都會講吓究竟近十年黎Pirelli 成為唯一車軚供應商嘅問題）結果今次引起紅旗，令到比賽得返兩個圈嘅追逐戰。正當大家以為HAM可以冷手執個熱煎堆，結果手多撳錯掣，引致煞車碟過熱，左頭煞車碟Lock-Up，由頭排起步直接變最後一名。結果係由PER勝出，之後係VET同GAS ，都係都係VET轉隊第一次行上頒獎台。

之後我哋返到法國，喺排位賽嘅時候，我哋再一次見到角田裕毅撞牆，佢今年咁多站比賽，都可以睇到佢係排位賽表演實在太唔穩定。之後返到正賽，只可以講，紅牛以其人之道還指其人自身，完完全全複製左平治係葡萄牙站嘅戰略，唔單止令到 VER 可以安全保住第一，咁樣可以令到 PER 攞到第三，成功喺積分榜大幅拋開平治。（其實今集我都覺得好悶，所以無乜嘢特別想講）

跟住我哋去到奧地利紅牛環，一連兩場比賽，請容許我偷懶，一段過介紹兩次比賽。作為紅牛的主場，紅牛當然有絕對優勢。由排位到正賽都毫無懸念，兩場也順利獲得冠軍；但緊貼車手和車隊排名榜之後的平治卻有天淵之別，雖然第一場HAM順利登上頒獎台，但始終一隻搵唔到適合嘅車輛設定，所以第二場更加變到挨打，最後更加因為車輛受損所以只可以獲得第四。至於其他車手，只可以講今場真係罰單大放送，一場不足80分鐘的比賽，連續開了13張罰單，我都唔知係唔係破紀錄，不過真係屬於近年難得一見。另外，星期六先生RUS係第二場紅牛環賽事，竟然為威廉斯車隊帶進久違了嘅Q3排位中，實在令人鼓舞。雖然正賽一直都能保持在得分位置，但始終車輛比其他車隊賽車弱，所以最後仍然未能取得任何分數。題外話，喺F1賽車完咗之後舉行嘅MotoGP賽事，再一次係3號彎，發生嚴重意外，雖然今次無人受傷，但真係都幾恐怖。

之後我哋返到英國銀石賽道，71周年以來歷史上第一次短途衝刺排位賽，雖然就冇賽前預測只是一列20節F1賽車拉龍巡遊咁沉悶，但老實說也只算收貨程度，因為如果真係想純粹完完全全對比技術，唔係應該用統一規格嘅車輛比賽會仲好咩？不過可能都係我幻想太多，所以都係算啦。去到正式比賽嘅時候，今年最大爭議嘅事件發生了，VER同HAM相撞，雖然賽後好多人覺得HAM應該對事件附上最大責任，但我個人始終覺得，兩邊都有錯，唔應該話邊一方需要附上全部責任。不過不過點都好，經歷咗大約40圈之後，我哋見到HAM順利爬過LEC並取得頭位，順利喺家鄉奪得八年霸。亦都令到平治車隊可以係積分龍虎榜上追番上嚟。

去到暑假前最後一站，匈牙利站。一場令人意外嘅比賽。先講排位，星期六先生RUS今年竟然第一次不能進入Q3；而去到Q3尾段，HAM做咗一個超級慢嘅Out Lap，完全超過107% 規則，但是卻不用受到任何調查。不過我個人也覺得是合理，因為雖然他以極慢的車速行駛，但是排在後面嘅兩架紅牛一直都沒有嘗試爬頭的動作，所以我覺得無需調查都係合理。去到正賽嘅時候，我哋再一次見識到BOT在濕地下嘅表演，今次更加引發保齡球，完全可以媲美上年義大利站咁混亂。紅旗重新開始之後，HAM再次因為計錯數所以由頭起步變到最後一名再出嚟追，不過都係無他嘅，始終平治車房係Pit Line入口，就算真係入去換軚都會變最後一個。一圈後入Pit換軚，之後又繼續開始HAMMER TIME，一路去到最後以第三名衝線，之後更加因為VET賽車抽不到一公升燃油檢驗引致再上一層樓，成為亞軍。不過我諗最開心應該恭喜威廉斯車隊久違了的得分，而且更加係至2018年意大利站之後第一次兩位車手同時得分。

回顧完比賽，大約講吓三個新人嘅表現。角田裕毅肯定係今年最佳新秀，但始終四年升三班實在有啲太快，其實可以睇得出佢有少少信心不足同水土不服，只係希望下半年可以有所改善，如果唔係出年想見到佢留底都唔係咁容易；另外兩位新人就真係唔使講，始終賽車研發落後，就算你係車神之仔或者真係有錢都好，架車無能力你都真係無可能麻雀變鳳凰。

下半季賽事受到疫情影響，澳洲、加拿大、新加坡同日本站已經先後宣佈取消，作為車迷，雖然係有啲遺憾但係都明白為咗車手安全係最重要。另外就係墨西哥同巴西比賽都應該好大機會會取消，只係希望今季賽事可以順利完結已經滿足。至於去到尾二站沙特阿拉伯站，希望可以比到我哋一啲精彩嘅比拼，當然最後一站阿布扎比嘅改動亦都希望可以令到沉悶嘅比賽有啲新鮮感，如果唔係，我哋又可以睇到多一次一邊睇阿布扎比日落一邊睇F1賽車巡遊嘅比賽。

最後最後，多謝你睇到呢度，如果想討論，歡迎大家一起留言討論，之後亦都希望你可以喺下面拍5下手支持我繼續創作嘅原動力（土下座