關於譚仔/三哥、comfort food

唔知呢期咩事，去到飯鐘又冇plan食乜，梗有譚仔/三哥喺左近。黐撚線，其實香港人係咪真係咁鍾意食譚仔/三哥（下稱譚三）啫？點解，點解可以開到仲多過7仔？唉算呢個唔係重點，我知道作為大眾comfort food嘅譚三係需要被尊重，但聽完W其中一句駁五刀嘅嘢「譚三只係變種車仔麵」再加埋我個人經歷，sor於我而言譚三真係唔係「在心靈上具有某種程度療癒作用的食物」⋯⋯

應該冇喺度提過，我獨自食譚三就會屙。呢個curse應該都跟咗我座底五年，嗰時我獨自飛返香港，連喺邊度返都唔記得，剩係記得落機後返屋企前做嘅第一件事係食譚仔，第二件事係屙到仆街。諗返都覺得誇張，大家要知道，間譚仔離我屋企不過幾分鐘路程，而屙到仆街係我落機後返屋企前做嘅第二件事。我唔信邪，其後都有試過自己食譚三，可惜無一幸免次次都屙到仆街。久而久之，久到我身邊九成九朋友都知，我食譚三嘅機會收窄到得返朋友口痕。

我諗都冇諗過呢個curse會有破嘅一日，仲要not in a good way. 我ex好鍾意食譚三，鍾意到講得出「吓譚三好食喎，我可以一日三餐都食譚三（留意返同樣句子亦適用於波仔叮叮飯上，cls）」。喺呢年我哋住過唔少地方，喺唔同地方嘅譚三留低唔少腳毛，最後定居於大埔。大埔太和一共有四間譚三，我諗我哋除咗食過3/4嘅譚三，應該都食咗區內3/4嘅粥舖。冇錯，個curse變咗我同佢一齊食都會屙，而且係兩個一齊屙。可惜屙嘔無阻佢對譚三嘅鍾愛，肚照屙，譚三照屌，最多同粥梅花間竹咁食，屌那星。去到幾時先開始停呢？可能係去到我同佢拗撬越嚟越多，多到我開始唔點同佢出街食飯（aka譚三），亦冇再點開口問過洗唔洗幫手外賣啲粥俾佢嗰陣掛。Btw, 廣記&發記>>>>>>>>>>>>>>陳漢記，不服來辯。

今日同媽咪行街，婆你阿麼邊諗到連海港城都有譚仔，我好條件反射地同佢講「喂唔好呀我唔食譚」，feel到佢有啲愕然，但我又唔係咁想同佢講關我ex事。去到飯鐘我拖咗佢食麥文，佢又係有啲愕然，話估唔到我想食呢啲。可能太耐冇同佢喺街食過飯，或者話太耐冇目的咁諗到乜食乜，佢開始唔記得查實我好鍾意食中式嘢，而呢堆正正係我嘅comfort food, 佐敦個area直頭係我嘅comfort zone. 我之前喺附近補習，早餐jap澳牛火腿通炒蛋熱奶茶，tea jap澳門麻辣腩熱杏霜，宵夜jap麥文豬手撈粗淨雲吞，有時行遠啲食佳佳。朋友chur hkiff bc/文化中心/圓方來回跑，jap嘅同樣係呢啲。埋單一睇，同食譚三差唔到幾多，但好食好撚多。

可能同「梗有譚三喺左近」有關啦，加上連鎖經營確保出品穩定（喺我角度係穩屙🙏），我明，我真係明，譚三做到大眾comfort food確實有佢嘅理由。但大家口痕而附近又有間望落幾jeng嘅粥麵店，可摸耳食少餐譚，試試佢呢？好食嘅，之後又可摸耳食吓譚又食吓佢呢？學我老友話齋，咩都要梅花間竹呀嘛。譚三你食少餐，佢唔會撐唔住；粥麵舖少條友食，分分鐘下個月就摺㗎啦。周不時見人屌香港人捨得食舊幾水拉麵唔捨得食舊幾水腩河，一啲都唔識尊重傳統心機嘢云云，雖則條脷同銀包都係佢哋嘅，我都係靜靜雞擺低個like. 物離鄉貴我理解，但點解物留鄉會賤？乜呢啲，真係登不上大雅之堂咩？無端諗起「鹹魚白菜也好好味」呢句，我想講，其實馬友鹹鮮、本地白菜，真係好好味。