【獨立歷史】復活節係一個起義嘅日子
1916年嘅復活節，愛爾蘭共和派發動咗一場起義。起義最終雖然失敗，但成為咗愛爾蘭獨立運動嘅轉捩點。同樣係追求自由同解殖嘅香港民族，可以點樣從呢段歷史中借鑒呢？
宗教衝突與殖民統治
愛爾蘭長期被英國殖民，主要矛盾係出於宗教原因。以新教為主嘅英國人，會逼害以天主教為主嘅愛爾蘭人。英國政府將土地沒收充公，鼓勵英國人移民到愛爾蘭，強行推行宗教改革，以殖民手段擴張宗教勢力。新教徒掌控愛爾蘭大部份土地，擁有強大經濟實力，成為統治階級同優勢族群。
1845年至1850年，愛爾蘭爆發咗「馬鈴薯瘟疫」，農作物失收令百姓面對飢餓同死亡嘅威脅。唔係住喺愛爾蘭當地嘅新教徒地主，竟然繼續將糧食出口牟利。英國政府嘅不作為，導致過百萬愛爾蘭人喺大饑荒中死亡。受限制嘅宗教自由同各種社會不公，造成族群矛盾，慢慢催生咗愛爾蘭民族主義。
自治同獨立嘅分岔口
愛爾蘭人渴望改革同解殖，主張自治同和理非嘅「愛爾蘭議會黨」代表社會主流，擁有英國國會內百多席愛爾蘭議席嘅絕大部份。喺1912年至1914年間，成功透過議會戰線爭取愛爾蘭自治，逼使英國通過第三部自治法（Third Home Rule Bill）。愛爾蘭民族主義者對自治方案出現分歧，溫和派認為接受自治就可以避免流血衝突；激進派就仍以獨立為最終目標。
寧為玉碎 不作瓦全
1914年爆發第一次世界大戰，英國忙於應付戰事，決定將愛爾蘭地方自治法延遲執行。英國向愛爾蘭徵兵，但愛爾蘭人覺得為英國而戰係一種背叛。主張獨立嘅愛爾蘭共和兄弟會(IRB)深信「英格蘭嘅危機係愛爾蘭嘅機會」，於是就聯同民間武裝組織 – 愛爾蘭志願軍策劃起義。
起義軍向德國購買武器，但運送途中被英國海軍攔截。面對兩難局面，如果取消起義，等待清算同大搜捕，係徹底嘅失敗。但如果堅持起義，起碼係一場「光榮嘅失敗」，至少將革命嘅火種傳畀後人，推動獨立運動到另一個層次。
復活節起義
復活節當日，過千名愛爾蘭志願軍帶住武器走上街頭，佔領首都都柏林各個重要據點，並喺總部郵政大樓向民眾宣讀「獨立宣言」，宣佈成立愛爾爾共和國。愛爾蘭總督隨即宣佈緊急狀態，英國政府調動軍隊鎮壓，大批英軍準備登陸愛爾蘭。
起義軍頑強抵抗咗好幾日，但始終敵我力量懸殊，加上計劃唔夠周詳，好快就俾英軍重重包圍。起義軍最後唯有宣佈無條件投降，堅持咗六日嘅復活節起義宣告失敗。
民族覺醒
起義過後，部分媒體公開支持鎮壓起義，唔少人話起義者係「暴徒」、搞亂愛爾蘭等等。起義者大部份被送往監獄，接受不義嘅審判，有啲被判「送英」，領袖就被判處死刑。
當一個個抗爭領袖被送上刑台處死嘅時候，輿論慢慢開始轉向。愛爾蘭人開始同情抗爭者，明白佢哋嘅犧牲都係為咗自由同民族大義。起義成功喚醒咗愛爾蘭人嘅民族意識，好多人轉投獨派陣營，決心為先烈完成建國大業。
兩年後嘅議會大選，主張獨立同勇武嘅「新芬黨」撃敗主張自治同和理非嘅「議會黨」，並成立愛爾蘭國會，從此愛爾蘭就慢慢走上獨立嘅路。
以史為鑒
相隔超過一百年，同樣喺帝國邊陲嘅香港正被中國殖民。香港民族歷經流水革命同本土思潮，現正企喺自治（一國兩制）同獨立嘅分岔口，有人仍然相信自治就夠，亦有人相信獨立係唯一出路。愛爾蘭民族把握政權最脆弱嘅時候發動起義，雖然係以卵擊石，但犧牲卻點燃起革命之火，徹底改變咗愛爾蘭嘅命運。
我哋唔可能模仿任何一個國家嘅獨立運動，因為每個民族都係獨特，歷史背景都唔同。但我哋必須以史為鑒，擴闊抗爭想像，咁先能夠喺歷史洪流中自決前途。