七日書 | 我的家庭故事 | 第三日 | 2025年3月5日 | 決擇

「你跟我定跟佢？」

當我媽得知及爸默認有第三者時，從客廳手拖著她紅色的拖喼，怒氣攻心的重語問坐在旁邊飯廳的我。從未試過離家出走的家，以怒氣遮蓋失望、請求我跟她走。由此至終，只求服從，不容許我有心理或實質預備。是表態立場的迫問。

大佬，你要我幾分鐘內決定放下所有我的計劃，即刻執我啲嘢，同你去唔知邊度，仲要受你嘅悲憤。咁我點呀？

「你不如俾我1年時間處理好我自己啲事，我哋屋企，同俾我喺屋企過多1次生日後，我就跟你。」

「你話㗎。」她打開大門，只剩下鎖匙鈕轉，滾滾的車轆同急急入𨋢的腳步聲留在外面回響。

明明係你哋兩個之間嘅問題，點解要我受你哋兩個嘅氣？兩個大人化身成兩位幼稚園鬧交嘅小朋友，而我要化身成你哋嘅老師、班主任安撫你們。

你知唔知我幾想兩個都唔跟，自己生活算啦？我冇義務承受你哋之間的恩怨、情緒。我寧願耳根清靜、心境平穩好過。