【香港民族】知唔知點解要叫大家做「手足」？

「手足！前面係咪放咗TG？」

抗爭咗大半年，香港人、抗爭者會互相稱呼對方做「手足」。「手足」一詞聽落好普通，但其實對香港民族有著深遠嘅意義。

手足相稱背後嘅意義

「手足」一詞喺呢場革命入面，係出自於立法會議員鄺俊宇。喺六月初佢講過：「我唔要我嘅手足流血、我唔要我嘅手足受傷，我嘅手足係呢度嘅所有人。」佢堅持用「手足」稱呼所有抗爭者，因為每一個抗爭者就好似我哋嘅手同腳，係身體嘅一部份，不容分割。當手足感受痛楚嘅時候，我哋都會感受切膚之痛。手足相稱背後隱含住一種共同體意識，視香港人為一個整體，你我不分彼此。

超越普世價值同良知

五年前9.28第一次發射催淚彈，螢幕前嘅你想像到在場學生嘅痛苦，所以義不容辭咁走去金鐘佔領區，展開咗歷時七十九日嘅雨傘革命。去到舊年6.12，好多人同樣因為想像到「手足」嘅痛苦，所以帶著悲憤加入抗爭，揭開咗時代革命嘅序幕。香港人好鐘意用民主自由去包裝呢場革命，因為夠晒普世同大愛。但問心嗰句，你抗爭嘅原因係唔係呢啲虛無縹緲嘅民主概念呢？

好多黃絲都話自己係因為「良知」而抗爭，但呢個世界經歷緊苦難嘅人有好多，慘過香港人嘅比比皆是。點解你嘅「良知」只係適用於香港人，而唔係其他受飢餓同戰爭折磨嘅人呢？可能你都會因為「良知」而去幫非洲兒童，但你又會唔會好似為咗香港人咁鞠躬盡瘁，死而後已呢？

看似陌生但感到熟悉

民族主義大師Benedict Anderson話民族主義就係「想像嘅共同體」：人們透過想像去創造出一個本質係有限，同時享有主權嘅政治共同體。[1] 我哋成日話有超過二百萬手足，但你有冇親眼見過晒每一個？我哋透過接觸唔同媒介，建構出一種民族想像，視香港人為一個共同體。呢種想像唔係虛妄嘅，而係確實喺我哋生活裡面：舖頭門外見到連豬貼紙，我哋就知佢係手足嘅黃店；行街見到有人戴豬咀，我哋會向手足點頭微笑；聽到Chandelier，我哋諗起嘅係肥媽有話兒。呢啲民族嘅符號同語言，連繫住我哋嘅情感，亦都界定咗邊啲係手足。即使你我互不相識，我哋都係情同手足。

苦難中煉成嘅民族

七一立法會義士、《香港民族論》作者梁繼平話：「所謂嘅共同體，就係能想像他人痛苦，並且甘願彼此分擔嘅群體。」佢話有句口號好反映到呢個意思：「我願意為你上前線擋子彈，你願意罷工嗎？」實情係，前線冇義務為你擋子彈，你亦都冇必要為佢哋罷工。但我哋將他人嘅痛苦同犧牲，視之為自己嘅痛苦同犧牲，並且將每一場抗爭，都視為對前人付出嘅肯定同追認，真正嘅共同體先能夠成立。[2]

香港民族嘅靈魂一早就喺我哋心裡面，而我哋無時無刻都用行動實踐緊。我哋會因為擔心手足安危而徹夜難眠；我哋會因為手足嘅犧牲而悲痛不已；我哋會因為區議會手足大勝而全城狂歡。我哋同喜同悲，皆因我哋係香港民族。即使同戴著口罩嘅抗爭者素未謀面，我哋都會視之為手足；即使同被告席上嘅義士非親非故，我哋都會視之為屋企人。我哋齊上齊落，皆因我哋係香港民族。

香港民族係抗爭嘅希望

民族主義係易放難收，香港國魂已經覺醒咗。喺過去兩個世紀，數以百萬嘅人甘願為民族犧牲，用血汗灌溉民族嘅果實。全民勇武、全民三罷需要嘅係願意為共同體犧牲嘅精神、強烈嘅民族意識。如今我哋面對中共殖民壓迫，大中華嘅官方國族主義荼毒緊我哋下一代。我哋與其繼續用相對虛無嘅普世價值作掩飾，倒不如勇敢、誠實咁承認香港民族，擁抱呢一份由心底而發嘅身份認同。只要我哋一日堅守住呢份想像他人痛苦、甘願彼此分擔嘅心，我哋一日都唔會輸。

你叫得我做「手足」，我哋都係香港民族！

[1] Benedict Anderson (1983). Imagined Communities: Reflections on the Origin and Spread of Nationalism.

[2] 梁繼平(2019)。英美港盟主權在民集會發言。