日本人仿製三國東吳衣著造「和服」？

（於二〇二二年六月九日修訂）

陶傑話「和服」係仿製三國東吳衣服而來，呢個講法相當有嫌疑。

一、日文維基話「吳服」只係指絹織物

呉服という呼び名については、これは和服用の織物の呼称の一つで、特に絹織物を指す語である。もともとは絹織物を指す語として、綿織物・麻織物を指す「太物（ふともの）」と区別されていたが、現在は和服用の織物の総称としても使われている

（翻譯：關於吳服這個稱呼，這是和服織物的稱呼之一，特別是指絹織物。 原本是指絹織物，與棉織物、麻織物的「粗物」區別開來，但現在也作為和服織物的總稱使用。）

二、《三國志・吳書》只得一條係關於開航路去台灣[1] 、日本（東吳稱日本為「亶洲」）做貿易，而開航路前，日本人已經有到會稽買布。[2]

《三國志・魏書》講「倭」嘅紀錄則有29條。同東吳唔同，曹魏稱日本做「倭地」，大概可講得出當時日本嘅勢力分佈，例如女王國、侏儒國、裸國、黑齒國等。當中提到「倭女王」應指當時日本勢力最大嘅部落邪馬臺國女王卑彌呼。

當時日本點睇都係同北方曹魏關係密切啲。事實上，睇地圖都見到邊個遠邊個近。至於「到會稽買布」，同「和服來自東吳」之間有否必然關係，宜由「講邏輯」嘅陶傑講清楚。

三、雖然當時北方人成日笑南方吳、越人「翦發文身，錯臂左衽」[3]，但到東吳時，衣著似乎同北方並無明顯分別。而第一件類似和服嘅服裝， 出現喺古墳時代，已經係東吳滅亡數十年之後。再者，和服同樣係跟北方人「右衽」，即穿上後，用左手執起左前襟，冚向右胳肋底，將右襟收喺入面，再綁帶。「和服來自東吳」之說真不知從何說起！

綜合來睇，似乎陶傑別有用心，用「和服來自吳服」呢個有創意嘅講法，反諷鳩作「華服」[4] 條友亂噏。可見「華上腦腦便殘」。

1. 東吳稱台灣為「夷洲」，之前講過，夷係東亞大陸土著，《人類基因圖譜》曾有一個講法，台灣原住民南島語族，喺萬多年前最後一個冰河時期，由東亞大陸行過台灣。當然，亦有另一個講法係掉返轉，由台灣去東亞大陸沿岸，畢竟南島語族的確猛料，最遠去到澳洲。無論如何，「夷洲」呢個名可反映台灣原住民同夷嘅關係。

2. 《三國志・吳書》原文：

二年春正月，魏（郡）作合肥新城。詔立都講祭酒，以教學諸子。遣將軍衞溫、諸葛直將甲士萬人浮海求夷洲及亶洲。亶洲在海中，長老傳言秦始皇帝遣方士徐福將童男童女數千人入海，求蓬萊神山及仙藥，止此洲不還。世相承有數萬家，其上人民，時有至會稽貨布，會稽東縣人海行，亦有遭風流移至亶洲者。所在絕遠，卒不可得至，但得夷洲數千人還。

3. 見《史記・趙世家》：「夫翦發文身，錯臂左衽，甌越之民也。」另外，現代斷髮紋身，根本係型，亦有實際需要。所謂「華服」根本多舊魚，企圖向香港人殖入子虛烏有嘅記憶。

4. 華服意思一向係「靚衫」，例如成語「錦衣華服」。又例如紅樓夢「慕美人之華服兮，熌爍文章」。遠少少，太平廣記有「見一女人，靚粧華服，穿越榛莽」。