宏觀四強已定 微觀杜曹以退為進致勝

今個星期英超最後一場，上演西北倫敦打比，由熱刺主場對車路士，上半場 0:0，主隊些微漸優，客隊情況一如星期二歐聯第一場對俄羅斯聯賽冠軍一樣，而結果亦都一樣，車路士德國教練杜曹於半場扭轉乾坤，球隊下半場判若兩隊，結果贏波。

究竟杜曹半場如何扭轉乾坤，作為業餘球迷，睇電視直播，我點可能知道杜曹更衣室訓話內容，只能由杜曹一個調動去理解：調走進攻中場 Mount（可以叫孟子 ？我拒絕跟隨香港胡亂翻譯之中文名），換入防守中場 Kante（可以叫更亭 ？剛剛傷癒復出）。

車路士屬於爭奪熱門，不論主客都以贏波作為目標，上半場表現平淡（未至於好差），下半場想入波，無論如何都應該加強攻擊力，應該換入攻擊球員先算正常，杜曹竟然換入防守球員 ？而且車路士場上根本已經有兩位防守中場 ，除非死守（車路士上次用同一招數，上個月對利物浦，不過當時車路士有 Recee James 領紅牌，十人應戰，明顯權宜之計），否則任何球隊都犯不著用三位防守中場。

不過職業教練當然比業餘球迷識波，換人立即起作用，車路士整個下半場佔盡優勢，連入三球，最後贏 3:0，三位入球功臣，兩位後衞，一位防守中場，正正半場換入之 Kante（通常一季只入一至兩球），如果要選 Man of the Match，根本正正教練杜曹。

事實上杜曹自上季季中接任車路士教練以來，絕大部時間都採用 3421（或 343 ？），今次半場之後，竟然改踢 352，即使我一介業餘球迷，都可以睇到車路士球員企位改變：

1. 左防守中場同左翼衞連成緊密小組，長期處於球場邊陲位置上上落落，對方要壓制，就要出盡左後衞、左中場以及左翼三人之力。

2. 右面情況一樣，右防守中場（Kante）通常企位極邊陲，與右翼衞距離好近。

3. 原來踢攻擊中場，從後支援中鋒 Lukaku，Kavertz 下半場踢得比 Lukaku 更加前，後段換入 Werner，亦非常明顯同 Lukaku 平排，換言之下半場打雙箭頭戰術，而當熱刺左右後衞都被車路士中場左右孖寶拉到球場邊陲，一對中堅當然難敵雙箭頭，要壓制就要防守中場 Hojbjerg（可以叫開邊埃 ？個姓正確讀音確實最近似粵語「開邊埃」）長期墮後幫手。

當熱刺有九個球員，平均分三份，每份都被各自推去球場最後、最左以及最右，基本上全隊已經散開，之間區隔距離整之大，難以互相支援，而車路士負責控制攻守節奏之中路防守中場 Jorginho（雖然意大利籍，不過巴西出生，用葡語發音，粵語應該音譯做所仙奴）基本上非常自由，隨意發揮。

熱刺教練面對車路士改變陣式踢法，基本上束手無策，三次換人，都未有換陣，眨眼已經打完下半場，如非守門員有高水準演出，加上運氣，戰果隨時變成 5:0 或 6:0。

近二十年歐洲以至世界足球，Mourinho 先帶出 Transition 概念，最重視轉攻為守或者轉守為攻一刻，如何準確部署掌握；而死對頭就有西班牙一派 Tiki Taka，由 Guardiola 提出控球至上，近五年一批德國教練又自成一家，以 Klopp 為其中代表人物，強調 High Press 前線搶迫。

同為德國教練，杜曹今年鋒芒畢露，已經取下三項冠軍，今場比賽，以退為進，以守為攻，令人大開眼界，甘拜下風。最終會有新戰術概念提出 ？我拭目以待。下個周末面對衛冕英超冠軍曼城，又可以破天荒一年內連續四場擊敗對手 Guardiola ？

今屆英超，雖然季初，四強壟斷之勢已經成形，每隊各有一個「屈機」球員（車路士有 Lukaku，利物浦有 Salah，曼聯有丙朗回歸，曼城有因傷仍未回復水平之 De Bruyne），加上其他不同配套，餘下球隊如無意外會被大幅拋離。單睇四隊每個星期輪流肢解屠殺中下遊球會，爭雄爭霸，每個月課金收費電視，總算值回票價。