五店兩日共收逾二十張傳票 友利冰室x勿當奴 老闆:搵食啫!

「過馬路不可打斜過，你唔講鬼知咩，可否俾個警告你呢?我十多年前亂過馬路，有個阿Sir埋來抄身份證，嚇吓，話下次唔好嘞，之後我無再犯。而家得黑同白，無灰色，一左一右，無中間，世界唔係咁。」

在社會打滾廿多年，友利冰室老闆爆炸頭經歷過舊時代，對比香港新時代，大有不同。

「(最近)我係馬路邊，親身見貨車開尾板，運輸(兼司機)在後面搬梗貨，前面畀人影相抄牌，以前執法人員可能望車頭，行個圈看看有無人，企在車頭等一陣，或抄其他車先，再返轉頭，佢哋都明白搵食啫。」

爆炸頭說，違例泊車按法例要抄牌，他只是同情身兼運輸的司機，一日人工扣除罰款及各式支出，久而久之，可能索性不揸車，寧取綜援，又申領各式津貼。「以前香港有灰色，沒學歷不要緊，揸的士，勤力揸三更、揸特更，可以揸(賺)到兩三部的士返來，而家揸一世都揸唔到一架。」

以他所知，無論公務員還是大企業高層，皆因退休、移民等各種原因流失，出現斷層，大家可能「博上位」，於是鬥「跑數」，爭取表現，而每人有其演繹跑數的方式。

友利五店兩日共收逾二十張傳票 感殺雞取卵

友利冰室原有五店，分別位於新蒲崗、觀塘、牛頭角、荔枝角和太子，兩日內差不多時間各收不同部門罰款傳票，總共超過二十張。有天，有關部門一時巡查兩店消防，剛好供應商送貨，放在類似走火通道位置，有關部門向友利發告票，爆炸頭質疑為何不是向供應商發告票。「唔係話呢啲時間無火警危險，但啲貨係好易搬開(爆炸頭向我展示相片做證明)，明知食肆中午最忙，根本飯市忙完就會搬開，係咪咁嚴重到要即時抄，無警告乜都無?遇咗呢啲不公好多次。」

有些人猜測是政治立場令友利被針對，爆炸頭認為大方向是政府財赤。

「唔好講黃藍、政見，我哋在國家心目中一粒塵都不如，佢哋唔需要做咁多嘢要你死，根本要你死亦有好多方法，我反而覺得而家係好殺雞取卵。」

「罰款、沒收及罰金」在政府2023/24年度及2022/23年度預算依次為20.6億元及24.4億元，佔政府收入總額依次為0.4%和0.5%。其中最惹人談論的「定額罰款制度（交通違例事項）」，2023/24年度進帳9.8億元，較2022/23年度11.6億元輕微減少，和2019/20年度看齊，不過，卻較2018/19年度多一倍。

政府預算2024/25年度「牛肉乾」維持在9.8億元，意味未來一年，也要發出約308.8萬張「牛肉乾」，即每日抄牌超過八千次。普羅市民的觀感是政府想藉定額罰款來增加庫房收入，政府消息人士則向傳媒否認。

「夾硬抄(友利)無問題，殺雞取卵，我索性執咗佢，成功令三十個家庭支柱無咗生計，有乜意思?我哋唔係賺大錢，而家係求生存。同事當唔當份工好重要係一回事，我盡老細本份，畀番你努力應得的錢。可能而家有啲家庭主婦覺得市道咁差，唔搵嘢做，係屋企攞綜援算啦。明明大家為香港好，點解要殺雞取卵?」

牛頭角友利上手是一著名茶餐廳，友利沿用其舖面裝修枱櫈，按法例改動雪櫃，但一直無法取得牌照，並遭檢控無牌經營，唯有結業。新蒲崗友利坊因租金大升而結束，觀塘店則不敵連鎖漢堡包店的優惠攻勢，目前只剩荔枝角店和太子店，合共五、六十個員工。

爆炸頭指出，大集團有律師團隊，政府部門向其發告票，必要做大量工作，友利這類小店則通常上庭認罪。他從背囊掏出一叠文件放在枱面，我瞪大眼。

「成叠都係錢，(我)放在背囊，警惕自己；近幾個月，有幾叠。」

多間小店因屢遭投訴而遭多個政府部門調查、檢控，加上市道差，被逼結業，他們不約而同稱，政府部門表示，收投訴就要行動。爆炸頭忿忿不平:

「(政府熱線)1823無敵，制度有問題，點解投訴人係零成本，唔需要證據?應有機制處理惡意投訴。以前嘅香港，唔需要殺雞取卵，搵食啫，好多嘢隻眼開隻眼閉，搵食啫!」

他見過以前的香港:有公司買冷氣機，香港負責人會利用權限，先批准後補文件，解救熱到滴汗的同事；日本人則堅守程序，一定要取得總公司批准才實行。「香港人最緊要件事搞掂。」

不其然想起以前常聽常說「走盞」、「執生」，靈活走位是香港人特色——不好意思，又說以前。

「以前鄧小平決定香港是中國對外的大門窗口，本身係窗口，就係勾結外國勢力，如果唔係，窗口用來做乜?」搜尋記錄，一九六零年，中共中央明確提出了「長期打算，充分利用」香港的方針；亦有香港史研究者指出，鄧小平當年以「拖字訣」對待收回香港的問題。

「咩叫國安，咩叫唔國安，有無好清晰定義，我聽大陸朋友講，在大陸生活咁多年，未聽過國安咁多，因為每個人心目中都咁愛國，唔需要下下攞出來講……謝偉俊議員都被人鬧，(我)唔知條線係點。」

立法會選委界議員謝偉俊本年一月兩度質疑小紅書治港，第二次是在立法會行政長官互動交流答問會提出，行政長官李家超稱謝偉俊用詞危險，令他想起二零一九年「黑暴」常用的「軟對抗」及「反動力量」形容詞。

謝偉俊愛國愛港，毋庸置疑，他投票支持二十三條，但通過後他將其facebook專頁下架，明言審視以往發表嘅帖文會否「太尖銳」，甚至引起「煽動」的聯想，計劃刪除敏感內容後才重開。他是律師，連他都如此審慎，普羅市民更加無所適從，擔心動輒犯法。

爆炸頭稱，不愛一個人，連討論價值都無。「大家都好愛個國家，好愛香港，才繼續討論，想佢繼續好，不是批評，建議係出於好意，否則乜水，問我陳小春有咩歌，我點答你?」現在似是「愛一個人，不能懷疑，不要問，只要信」。

他盛讚鄧小平說的「五十年不變」好好，原意是五十年內國內生活水平提高，人民知識水平提升，與香港一齊升。不過，高鐵一通車，香港愈溝愈淡，加速香港和內地文化水平拉近。

「而家氣氛，有啲人講寧左勿右，我講，大家一齊和諧搞好佢，仲係度摸索緊，(我)成日踩條線，否則唔會有那麼多法庭罰款，避唔到條線，(而家)只係(求)點樣在罅縫中生存。」。

「香港而家太單一，愈來愈得一種聲音，不限於……不是講政治，而是工作，愈來愈狹窄，我好努力求生存。」

他知道有公屋居民本身在大陸有幾個物業收租，太太以團聚申請來港後，返回大陸居居住，丈夫繼續在港工作，他奇怪他們為何不是返回機會處處的大陸團聚，倒是土生土長的香港人未必有公屋住。對於這些民生問題，他體諒李家超政府以國家為先，二十三條為先。「我看無線新聞…」我狐疑。

「我喺赤柱探監等個幾兩小時，睇到無線新聞， 見到家超BB，開心到差啲起身拍手!」

猛然，我語塞。

由工程轉做飲食 為保存燒味傳統

爆炸頭做了工程二十年，客戶遍及建築、維修、零售等。數年前，家人有開燒臘舖的親戚仙遊，爆炸頭覺得那舖的燒味很好食，有見一班夥計做了二十年，於是他二零一八年開友利坊，想保存傳統，由是「踏上辛苦而坎坷的道路」。

起初僅新蒲崗一間友利坊時，雖然不是賺大錢，但都能營運，之後開分店及預料不到的遭遇，至今累積虧損逾千萬元。近月友利精簡餐牌，只保留招牌作及最受歡迎食品，曾贏盡口碑的燉湯已暫停，「若多人叫，有錢賺，我點會唔做?」

友利是他獨資，「我咁性格，點同人合資」。

早前抑鬱到想死

爆炸頭一邊說自己辛苦坎坷的路，另一邊又總能正面描述，我由衷佩服，向他討教如何建立正面心態，他答，因時常覺得有人更慘，例如其他國家的飢民，「我真係好正面，如果唔係好辛苦」。不過，他透露也有情緒低落的時候。過年前曾斷斷續續發燒個半月，體溫高達三十九度，病兩天後好轉，返工兩天後又病，反反覆覆，只好留在家，期間收到牛頭角友利接連遭不同政府部門發告票，卻無法返舖頭幫手，整個人覺得很無助。「抑鬱到一個點自己都想死，嗰排好壓抑，唔去見人，唔想放負能量。」

最後他靠自己跨過。

「最後諗通咗:我仲有自由玩到手機，唔使食食唔落的烟仔，唔使食M&M，有得食Kinder出奇蛋。」

我在家聽錄音，逐字逐句記錄至此，莫名鼻酸，眼眶泛起薄薄的淚水，真沒用。

爆炸頭生於二月二十九日，四年一個生日，可貴。今年他在兩間友利歡迎野生捕獲，我錯過了，希望四年後順利在友利祝他生日快樂。