釜山 16 年前後

上一次到釜山電影節，已經 16 年前，當年 2003，我首次入選 HAF，首次接受南華早報訪問，朋友以為我終於有機會做導演，結果撞正沙士，HAF 取消，然後補送釜山創投。

當年去到海雲台，其中一個主場館 Paradise Hotel 附近，都比我想像荒蕪；點知 16 年後再到釜山，整個地區已經脫胎換骨。

倒數兩年前，老婆仲未應承做監製，我已經睇完《叔·叔》劇本，同一般同志片分別好大，觸及老人以至家庭問題，好有意思。原本能夠去釜山電影節做世界首映，而且幾日前先攞到金馬獎五個提名，一班幕前幕後能夠再聚埋一齊，應該高興慶功，不過好明顯大家都為香港擔心，想知道最新消息，未有完全盡慶。

當然，16 年後，我自己都終於做到導演，有自己電影作品，亦去過其他電影節，所以見到今屆釜山電影節表現，實在有所感觸。

作為亞洲 No.1 國際電影節，釜山過去幾年經歷好多風雨，政府過度介入，令南韓影圈中人反感抗議。

結果今屆自己身歷其境，親眼見到各樣安排都出問題，由演員酒店接待、人手交通票務安排，以至基本到映後 Q&A 程序，口多講句，連香港小型電影節都不如。

好彩《叔·叔》主角太保女兒精通粵、普、英、俄、韓五種語言，臨時兼埋翻譯，先令 Q&A 順利完成。