應做唔做嘅抗疫措施

政府喺2月14日宣布向財委會申請注資270億至防疫抗疫基金。已經去到第六輪，以為咩嘢「補漏拾遺」都做足啦，點知……

一、支援前線工人嘅「抗疫津貼」cover：政府外判/私人樓宇/工商物業嘅清潔同保安人員、安老/殘疾院舍員工、藝文創界自由工作者、同埋受重創行業嘅從業員，❌唯獨漏咗公共交通工具同醫管局醫院嘅清潔工人。（明明呢兩個都係高危工種……一個日日接觸好多人，一個日日接觸病人）

➡️資料來源：政府新聞稿附件

二、千呼萬喚要將武漢肺炎納入職業病，點知只係換嚟被衛生署強制隔離可以當放病假，攞到五分四人工。因為中招而被停工或被炒魷魚嘅工人就毫無保障，宜家政府竟然仲修例，開路俾僱主解僱拒絕接種疫苗嘅工人。🤬咩料啊！

➡️其實《僱員補償條例》早已納入🤒傳染病：肺結核、SARS、禽流感等等都係條例認受嘅「生物因素所致職業病」，不過現時條例只係保障因為診治同照顧患者、處理病源、以及從事相關研究而接觸到傳染病嘅人員。用返呢套做法的話，前線非技術工人一樣無份。

三、政府推行到宜家都無人聽得明係咩嘅「動態清零」，又谷針又搞疫苗通行證💉。但對於疫苗副作用、打針後出現不良反應甚至死亡嘅個案，一直無深入同公開嘅醫學研究，又叫市民點樣有信心可以捱過呢一波疫情？

➡️與其大搞勞民傷財嘅措施，倒不如好好利用勞工處喺《職業安全及健康條例》之下嘅權力同罰則，確保僱主做足措施、提供適當同足夠嘅裝備去保障僱員安全同健康，並勒令有問題嘅僱主停工

四、惟一一樣好事，就係香港政府破天荒設立$10000嘅臨時失業支援💰，都算 better than nothing。