七日書｜大同

如果仔細斟酌定義，「世界大同」、「集體意識」呢啲概念各自都有特定嘅用法，其實並唔相關，但與此同時，佢地又似乎指向一個（我自以為嘅）真相。會唔會有一個可能，地球七十億人，甚至花花草草，動物石頭，以至宇宙萬物都係合一？呢個 statement 不可證偽，毫不科學，只係一個唔知喺邊到嚟，又唔知何處安放嘅 amusement。

所以要我想像平行時空嘅我係點，真係有啲難。就好似 Everything, Everywhere, All at Once 入面咁，可能有個世界我哋都係石頭？又有個世界我哋啲手指係熱狗腸？

有時我幾鐘意呢啲虛無縹緲嘅討論，因為可以暫時逃避生活裏面雞毛蒜皮，但又無比真實嘅煩惱。有時我又覺得係浪費時間，諗得太多即係做得太少，自尋煩惱，得閒諗下點樣搵食好過。

有時間可以咁樣浪費，都算係一種幸福嚟嘅。只不過，我唔肯定呢個世界係咪真係需要 AI 令所有嘢更有效率。唔講失業問題，假設大部分人突然間好得閒，唔需要擔憂生計，生存會唔會變得無意義？當然呢個唔係我需要擔心嘅問題。同時，喺現實嘅戰火貧窮疾病困苦面前，虛無只係無病呻吟。

所以，就算世界真係大同，宇宙萬物加埋其實就係一個網絡 / 系統 / 整體，whatever you call it，我都好慶幸只係作為一個渺小嘅細胞 / 個體 / 節點去感受呢個平行時空。