日本赤軍派

2018 年 6 月 7 日

我童年時代，已經好喜歡睇電視新聞，每日都會睇，比起長輩成年人都更加熱衷睇，甚至喜歡模仿主播報導新聞，電視講一句，我又講一句。當時七十年代，其中一個經常聽到，正正日本赤軍派恐怖份子，意想不到今日竟然可以見到真人。香港獨立電影節今個月又有放映，主力播放六十年代反動導演若松孝二多部作品，而若松孝二已經去世，不過若松孝二親密戰友足立正生仍然在生。足立正生不單止編劇導演，更加親身投入革命，成為赤軍一份子，逃亡中東，大概廿年前九十年代尾先正式被捕，遣返日本入獄，今日即使出獄依然被禁止出境。今晚作為電影節最後一場放映，映後座談會直接隔空與足立正生網上即時對談。雖然一把年紀，足立先生依然熱血，亦有留意香港雨傘運動，甚至仍然相信共產主義，不過亦承認赤軍革命失敗，而且相信要繼續鬥爭，唯一途徑似乎只有非暴力抗爭。