三日書｜未竟

要講挫敗感，其實好似乜都可以有。

讀書嚟講，好似咁多年冇真係攞過全班第一，由細到大都唔鐘意背書，甚至乎直到中三之前都唔覺得自己有語言天分。去到 law school 又天外有天，同學 year 3 就搵到 ifirm TC，自己要到 PCLL 先簽到間 local firm。

細個喺 school band 玩咗幾年上低音號，又係唔算有咩天分，考完 5 級好似拍子、音準都冇乜進步。當初 FF 嘅梗係唔只坐後排吹配樂，而係玩到 solo，唔洗譜就吹到流行曲。最後當然冇發生到。做咗一兩年嘢就買咗支法國號（本身覺得 horn 型好多），然後又 loop 多次。蜜月期覺得好好玩，學咗幾個月就冇乜癮，尤其咁大個人，工都返緊，特登上堂考級就算拎到張 cert 都唔知比邊個睇。

好多人回憶童年都係覺得落樓下公園玩最開心。唔知點解，我玩親捉衣因最後都係變咗做捉嗰個，追住其他人越跑越攰，越攰又越追唔到，都幾冇癮。去到大個啲，當然又成日羨慕點解人地可以一大班人咁 friend，想埋堆又埋唔到，識女朋友更加唔洗講，話自己係毒 L 冇自信冇朋友講咗好多年。

中學六年花最多時間做嘅嘢係打機。早幾年唔知點解有鋪癮想整 game，出國讀書第一樣諗嘅其實係 game design 嘅 master。毫無意外地，試咗兩個入門 course 就發現玩 game 同整 game 係兩回事，coding 又好、3D art 又好，比我更有天分、更努力嘅人大把，最後都係讀個靈活啲嘅 liberal arts degree 算。

同時，又唔可以忽視上天種種眷顧。

去到高中，唔知係考核重點唔同咗，定係出面補習幫助到開竅，睇文、寫文冇曾經覺得咁難；數學更冇信心，但操操下卷去到 DSE 都應付到考試，仲拎到個 5；更加冇預過碌到入 law school，有一日可以走出屋邨。依加回望喺香港返過嘅兩間 law firm，相比傳統 magic circle / 美國 firm 已經唔算辛苦，冇乜值得抱怨。

到依加都唔識聽完首歌就吹返出嚟，甚至擺低咗咁多年，其實連 scale 都唔係好得。慶幸嘅係，就算認知到我冇乜 skill point 擺咗喺音樂上面，我都冇完全放棄呢個 hobby。嚟愛沙尼亞嗰陣特登帶埋支 horn 上飛機，雖然擺咗喺到封塵半年，但係早一兩個星期拎出嚟玩都仲吹得響。If anything，玩 hobby 從來都唔需要叻，甚至唔需要 achieve 任何嘢，enjoy 玩嘅過程就係目標 — 呢個覺悟用咗唔少時間先有，但企後一步睇，又完全唔遲。

最感激嘅係，老實講我有時都幾生人勿近，唔知上世做咗咩好事，咁多年嚟身邊總會有貴人（或者傻仔傻妹）喺我呢個唔可愛嘅人身上搵到可愛之處。離開香港後識咗好多新朋友，又有老朋友、舊同學 reconnect 返，其實唔孤獨呀。

至於整 game …… 哈哈。好彩挫敗得嚟都仲有少少硬頸：唔係專注 game design 咪讀下 elective 囉，起碼依加了解行業競爭有幾大，開 studio 嘅話有咩商業考慮。雖然係柴娃娃亂咁整，起碼都整咗個細細地嘅 proof of concept 交功課（好似話未有完整關卡/系統都未稱得上係 prototype？）到呢個學期，終於玩咗第一個 game jam，又有個用 twine 整 interactive novel 嘅 group project。技術門檻低之餘，又有得學度稿、sound effects。講咗咁耐，起碼 2025 年開咗個 itch.io，開始儲下 portfolio。嚟緊仲有兩年時間玩多啲 game jam / bootcamp，又訂咗個小目標比自己，算係咁啦！

所以呢？講完一輪主旨就係「睇開啲」？唔係啦。一個人睇唔到希望嗰陣講咩都冇用，比其他人用自己嘅經歷嚟撻仲衰過咩都唔講，所以我都唔想勉強勵志。

咁點算呀？

難關繼續有 繼續愁

神經也壞透 看不到出口

個個在搏鬥 但你卻退後

So what？

留得青山在？都唔係呀。Buy time 等待轉機，前提都只係搏一個好嘅結果，希望苦盡甘來。What if it never does?

唔知點解，對我黎講最解脫嘅係人生虛無。係呀，人終須一死，出世嗰陣咩都無，死咗之後又咩都帶唔走。錢財身外物如是，所謂流芳百世、名留青史，又關你咩事呢？（所以梵高真係慘。。。）

人生如戲，呢個遊戲唔好玩咪玩第個囉。學MM話齋，七百萬人有七百萬種生活，如果唔向上比較，還原基本步，由生存必需嘅衣食住行諗起，其實遊戲人間又好似唔係咁難。