IPFS 指纹 这是什么
隨筆：香港「無人消費」背後，「城市地方魅力」嘅問題係關鍵
香港「無人消費」背後，「城市地方魅力」嘅問題係關鍵，分享少少諗法：
1. 經濟唔好、美元強勢令港幣喺其他地方購買力加強、中產移民、城市氣氛、區域整合，係大環境，呢啲唔多講
2. 但唔代表吸引本地人同遊客消費，一定會徒勞無功，除咗因為價錢高所以產品同服務要去到特別高質素外，香港要集中諗呢座城市有咩獨特嘅嘢可以俾人享用、有咩係離開香港就搵唔到
3. 呢樣嘢本來係香港強項，因為香港係全世界最重要嘅大都會之一，呢種規模嘅國際城市唔多，但要諗得更細緻，先可以喺新時代轉變為令人願意喺度消費嘅講法
4. 地方、城市空間、文化、故事、歷史、特殊連繫、城市硬件等，呢啲嘢先係真正依附喺香港，完全搬唔走嘅嘢，所有呢啲嘢加起嚟嘅整體，可以叫做「城市地方魅力」
5. Covid後，連同上面第1點講嘅大環境，「城市地方魅力」變得越嚟越重要，同時要用最新嘅方法同媒介去講述，先留得住本地消費者同遊客，喺呢座城市活動同消費
6. 認識同講述香港「城市地方魅力」，係專業知識，坊間有好多人努力做(身邊唔少朋友同我都專做呢樣嘢)，而家係一個關鍵時刻，令呢種知識推廣開去，兼建立出香港講述自己嘅新方法
7. 其實唔同城市都有佢本身嘅「城市地方魅力」，爭在搵唔搵到、講唔講得清楚、有無成功扣連到去消費同旅遊業，夠人講而且講得好，甚至可以無咩「先天嘢」都留得住人同散發魅力，香港「先天嘢」其實極多，接下來真係有好多嘢可以做好