「惠方卷」與「盆菜」

今年（壬寅年）係陽曆2月1日開始，所以年初三係日本嘅「節分」。喺日本立春前一日叫「節分」，有撒豆、柊鰯以及食「惠方卷」嘅風俗。

日本節分係一個「雜節」，有人講上古人視立春為新年，節分就係立春嘅「除夕」。撒豆嘅起源於上古中國嘅追儺習俗，歲暮撤豆嚟驅散五方疫鬼。但身為關西人後裔嘅我，節分就係食「惠方卷」嘅節日。

「惠方卷」係節分當日食嘅卷壽司，食「惠方卷」嗰陣要面向「惠方（今年係壬，就係北北西）」，今年度福德神嘅方位嚟默默無言，一次過食晒整條。呢個風俗嘅歷史唔太長，二戰前後喺大阪開始，1970年代嘅傳媒報導令呢個菜式成為大阪附近嘅傳統習慣，跟住1980年代之後隨著壽司連鎖店同便利店嘅興隆，呢個菜式急速全國化，2010年代96%嘅日本人知道「惠方卷」嘅存在，同埋8成都食過呢個菜式（恵方巻きのアンケート調査(10), 2014年）。

今年我食緊「惠方卷」嘅時候，諗返起香港都有「惠方卷」咁近排開始受歡迎嘅節日菜式，呢個就係「盆菜」。岩間一弘喺《中国料理の世界史》（慶應大学出版会、2021年）中介紹呢個菜式「一朝成名天下知」嗰過程，話喺香港，「盆菜」喺90年代以後畀政府「發現」，將盆菜定為香港傳統嘅菜式，佢哋（政府、建制派、鄉事派等等）稱揚香港本土文化嘅同時，強調起傳統同中國文化、歷史嘅連續性。

我覺得該書解釋嘅盆菜現代史好有趣，令我感到喺「香港」文化認同上90年代擁有嘅重要性。90年代香港人自己發現咗唔少香港「本土」嘅嘢，其中一個係「茶餐廳」。吳俊雄、馬傑偉、呂大樂編《香港‧文化‧研究》（香港大學出版社，2006年）中，梁世榮「茶餐廳與香港人的身份認同」說明，茶餐廳同埋茶餐廳有關嘅嘢食90年代先開始畀傳媒、文筆家取材。由此可見，關於香港嘢食，喺90年代香港，盆菜成為一道「國民食national dish」from above，茶餐廳成為一道「靈魂料理soul food」from below。

　　我喺香港嗰陣，節日同朋友聚會就去打邊爐，好少機會去食盆菜，所以我以為對香港人（尤其喺市區長大嘅後生仔）嚟講，盆菜只不過係新界嘅習慣、菜式添，因為香港居民祖輩嘅大半係二戰前後喺大陸移民到呢個城市，唔share呢樣習慣。但係呢啲年所有消費行為「分化」為黃藍之後，見到唔少黃店喺節日推出各種各樣嘅盆菜，跟住我返咗日本之後，東京隔離有啲「港式」餐廳雨後春筍咁開店，佢哋都喺農曆新年前後賣盆菜。

總之我覺得，通過呢兩三年嘅經驗同diaspora，香港人開始「光復」盆菜成為自己嘅嘢。我唔知我諗法啱唔啱，大家點睇呀？

追伸：我喺Twitter見到，唔少馬來西亞華人都食盆菜，睇落佢哋視呢個菜式為客家菜之一。我唔知道喺香港盆菜係圍頭人嘅菜式定係客家人嘅菜式⋯⋯