四日書｜愛理不理

識得呢隊 band 係因為 form 3 鐘意過一個好迷佢地嘅女仔。依加當然事過境遷，但無礙當年一個青春期恨拍拖嘅中學雞日日叫春。想像住愛一個人係點（”I’m not me when I’m not with you”），然後感動自己，算唔算係愛嘅一種形態呢？

之後又等多六年先踏出只有自己嘅世界。基本上， 初戀就係 “And I don't wanna be somebody without your body Close to me”，由頭到尾都係一啖砂糖一啖屎，幾次分開又因為荷爾蒙拉返埋一齊。Technically 都唔知算唔算有拍過拖，after all 我嗰陣冇表過白，心裏有數一問就玩完。嗰陣嘅我愛得好卑微，覺得整定成世都係一個人，竟然有人 kind of 睇得上自己，已經係偷黎嘅幸福。

同 J 分手先知道，就算細個同老豆鬧交喊得幾淒涼，原來個心仲感受返一樣嘅痛。之後好少再咁撕心裂肺，唔知係麻木咗，定係大個之後就唔會再感受到咁多情緒。點都好，雖然又變返自己一個，但係聽住呢隻歌嘅我，又好似開始有啲開竅。

有一段長時間都覺得 C 係真正嘅救贖，始終佢真係 wholesome。當然，最後行唔到落去先發現，文學上真正「悲劇」嘅定義唔係比外在嘅嘢打低，而係因為主角嘅缺陷自己攞嚟衰。原來世界上冇人可以拯救另一個人。

又有一段時間覺得同 S 一齊都係當佢水泡，嗰大半年都係浪費時間、毫無意義。去到呢一刻，不得不承認係佢令我明白，未必下下都要追趕得咁辛苦。有一日過一日又點？就算大家都好多包袱，day one 已經知道大家都唔 ready 拍拖等等，其實無礙我哋中間有過幾個月簡單嘅幸福（講緊只係成日有個人喺屋企，半夜肚餓就整熱啲急凍雞翼，或者落 OK 買嘢食咁簡單）。

經過六年有拖拍嘅日子，舊年終於真正變返單身，比一層層嘅傷口慢慢復原。當然一路以嚟，困擾嘅唔只係感情事，亦有家庭、前路等等。慶幸嘅係，呢啲愛過我、或者我愛過嘅人都證實咗，以前成日擔心成世冇人鐘意真係好傻。與此同時，當我唔再處於相對匱乏嘅狀態，新嘅挑戰就係下一段關係能唔能夠真正咁愛一個人，多啲為佢着想。